jump to navigation

Cakeuk February 16, 2007

Posted by suhraaceh in Uncategorized.
1 comment so far

Watee ulon tuan mantong manyak, geupeuruno nazam nyo le ureung syik. Nazam nyo that meusyeuhu bak aneuk miet Aceh watee nyan. Nazam bhah cakeuk nyan teumanyong pakon naleung jeut panyang. Cakeuk nyo hana i piyoh sigohlom trok bak punca masalah. Meuno keuh nazam jih, jeut neubaca hai mandum syedara:

Cakeuek weuk-weuk

i dong bak naleung panyang

pakon panyang i kah naleung?

hana so rot i lon hai Po

pakon han ka rot i kah keubeue?

hana so rabe i lon hai Po

pakon han ka rabe i kah aneuk miet?

saket pruet i lon hai Po

Pakon saket i kah hai pruet?

bu mentah i lon hai Po

pakon meuntah i kah bu?

kayee basah i lon hai Po

pakon basah i kah kayee?

ujeun rhah i lon hai Po

pakon ka rhah i kah ujeun?

cangguk lakee i lon hai Po

pakon ka lakee i kah cangguk?

uleue pathuk i lon hai Po

pakon ka pathuk i kah uleue?

siwah tak i lon hai Po

pakon ka tak i kah siwah?

galak-galak ku tak sigo

Tokoh sentral lam nazam nyo nakeuh cakeuk, cicem nyan kayem udep bak bineh krueng. Bak si uro cakeuk nyo ji kalon naleung nyan panyang. Meuheut jih tupeu masalah pakon naleung nyan panyang, sabab naleung panyang kon keadaan nyan lazem lam masyarakat nyan sabe lam keureuja, masyarakat nyan sabe lam buet jroh. Cakeuk nyo meuphom bahwa nyan tupeu masalah naleung panyang nakeuh naleung nyan keudro, kon bak trieng, kon bak beuringen, kon batee puteh, kon ija puteh bak batee jeurat.

Hana cakeuk nyo ji im keudro watee i kalon naleung panyang, dan hana cit langsong kram krum jijak cok sadeup jikoh naleung panyang nyan keudro. Ji tanyong ilee peu masalah jih langsong bak naleung nyan, lheuh nyan meutalo laju sampe trok bak puca masalah, rupajih sabab siwah nyan let uleue.

Dari nazam nyo tanyo jeut meuruno kiban saboh investigasi beu tapubut sigohlom konklusi ta cok, dan sigohlom aksi ta pubut. Meunyo hana investigasi, si naleung panyang jeut keu korban nyan ta inanya, atau aneuk miet nyan hana i jak rabe keubeue jeut keu tersangka. Investigasi nyo nyan me geutanyo trok bak punca masalah, nyan lam nazam nyo geupuduk siwah nyan cangklak. Siwah nyan cangklak nyo, sabab i tupeu hana pat jimeusulet bak cakeuk, jijak ancam cakeuk ngon kata-kata: “galak-galak kutak sigo”.

Nazam cakeuk nyo jeut ta kalon keu saboh patokan lam udeup geutanyo ureung Aceh, saboh nilai nyan jeut ta kheun “Acheh value” tatanilai udep ureung Aceh: “pareksa dilee sigohlom peh palee”. Hana jeut ta jak tudoh laju sidro-dro syedara geutanyo sigohlom ta pareksa ngon cara nyan beutoi dan elegan. Nyo cit nyan Geuyu le Allah Ta’ala lam surat Al Hujurat ayat 6:

Hai mandum ureung na iman, meunyo trok bak gata ureung fasiq nyan me saboh haba, pareksa ilee beuget, bek sampe gata jak peutrok musibah ateuh saboh kawom nyan gata hana tupeu keadaanjih, nyan peuget gata meurasa teulah ngon peu nyan gata pubut.

Advertisements

Asai ureung Aceh January 7, 2007

Posted by suhraaceh in Uncategorized.
add a comment

Assalamu alaikum.

Rame that ureung nyan peugah, Aceh nyo nakeuh singkatan dari Arab, Cina, Eropa, Hindia. Meunurot ide nyo, ureung Aceh nakeuh asimilasi dari peut boh bangsa nyan rayek. Ureung asai dari Arab, Cina, Eropa ngon Hindia geumeuranto trok u tanoh nyan teuma geukheun Aceh nyan. Jadi bak ceurita nyo, Aceh nyan teubentuk nakeuh lheuh mandum awak nyan, dari Arab, cina, Eropa ngon Hindi trok meusapat.

Haba nyo meunyo ta pike leubeh lhok, jeut han ta pateh. Sabab nanggro Aceh ka teudong trep sigohlom awak Eropa tupeu kiban cara jak u Asia Tenggara. Awak Eropa baro tupeu jalan jak u Aceh lheuh Vasco de Gama meuteume jalan u Asia, bak abad 16 Masehi. Ureung Cina pih bak masa nyan nyan jak meuranto sidro dua, kon meukawom. Baro awak nyan jak meuranto meukawom-kawon u Asia Tenggara nakeuh bak masa awak Eropa trok. Jadi haba nyan peugah Aceh nyan singkatan dari Arab, Cina, Eropa, Hindia, han jeut ta pateh. Malahan meunyo jeut, ta tulak.

Ureung nyan takheun ureung Aceh ka na bak ujong pulau Sumatera nyan meuribee atawa meuploh ribee thon. Meunurot Tgk. Ali Hasymi, bak jameun dilee ureung Aceh teubagi lam peut bok kawom:

  1. Kawom Imeum Peut
  2. Kawom Ja Batee
  3. Kawom Tok Sandang
  4. Kawom Lhee Reutoh

Meunyo ta lhoh leubeh lhok, asai peut boh kawom nyo dari peut boh gelombang migrasi manusia u Aceh. Kawom Imeum Peut trok dari Persia, kawom Tok Sandang trok dari India. Teuma kawom Ja Batee ngon Kawom Lhee Reutoh ka awai udep i Aceh. Meunyo lon spekulasi, kawom Lhee Reutoh nyo ha hubungan ngon ureung-ureung asli (native) i Andaman ngon Nicobar. Kulet ureung nyo itam ngon ok keuriteng.

Meunyo ta kalon bak teori Out of Africa, ureung nyo ka geutamong u Andaman sekitar 90ribe thon u likot. Lheuh nyan trok kawon Ja Batee, nyan saboh masa ngon Orang Asli i
Malaysia.Meunyo ta kalon bak sejarah geologi Aceh lam kisah-kisah jameun, teori Out of Africa gelombang phon rot Andaman, lheuh nyan u Aceh, bacut-bacut trok u Australia (jeut keu ureung Aborigin), jeut ta cok keu bahan kaji. Bak ceurita jameun, kapai-kapai geuteungoh bak pelabuhan i daerah Montasik/Kuta Baro. Lheuh nyan nan gampong-gampong i nan pih cocok ngon suasana daerah bineh pasi. Na gampong Pante, na gampong Tanjong. Teuma daerah Cot Keu-eung nakeuh daerah kareung i yup jih. Bak watee nyan daerah Banda Aceh nakeuh laot. Referensi nyo jeut keu petunjuk keu tanyo, bahawa ureung Aceh ka meuduk bak nanggro nyan geupeunan Aceh, ka geumarit basa Aceh, bak masa sigohlom jameun eh keuneulheuh (Pleistocene, 11000 SM) .

Untuk ta peusaheh ata nyo, peureulee ureung-ureung arkeologi, antropologi, ngon paleontologi nyan tem peuget penelitian tentang sejarah geologi ngon ureung Aceh. Mudah-mudahan na awak geutanyo Aceh nyan pakar lam bidang nyo, dan geutem teuliti masalah nyo. Jadi bek sabe-sabe geutanyo keunong peungeut ngon mitos Arab Cina Eropa Hindia.

Sumber eleumee nakeuh dari Allah, usaha nyan dari geutanyo.

Mat aweuk January 5, 2007

Posted by suhraaceh in Uncategorized.
add a comment

Assalamu alaikum,

 Jino geutanyo ka lam buleun Zulhijjah 1427 Hijri. Uro nyo, meunyo bak almanak lon, ka bak 15 urobuleun. Lam basa Aceh, buleun Zulhijjah nyo ta kheun cit buleun Haji, sabab dari indatu geutanyo uro jeh kon, bak buleun nyo geuingat mandum syedara nyan ka leupah geujak ek Haji u Meukah. Teuma nyan hana raseuki lom, geumeudoa ngon geulakee doa bak syedara ngon wareh nyan ek Haji, bah bagah meuteumee raseuki jeut ek haji cit.

 Lheuh buleun Haji, geutanyo tamong bak buleun Asan Usen. Lam basa Arab geukheun buleun Muharram. Teuma le indatu geutanyo geupuduk nan Asan Usen, keu geutanyo sabe jeut ta ingat keu tuco Nabi Muhammad SAW, nyan syahid bak jaro ureung pasek (fasiq). Sayyidina Husen r.a., syahid i Karbala. Le awak pasek nyo, taku gobnyan jikoh, ulee gobnyan jime u Damaskus, jipeujok bak Yazid Laknatullah. Lagee nyan cit teukeudi ateuh Teuku Ibrahim Lamnga, lako phon Cut Nyak Din, nyan jikoh taku le Beulanda lheuh nyan ulee gobnyan jipaso lam seurahi. Badan nyan tinggai keuh nyan teupeusiyup lam jeurat gobnyan i likot meuseujid Lamnga i Aceh Rayek.

 Lheueh buleun Asan Usen, ta tamong lam buleun Sapha. Bak buleun sapha, ureung Aceh geu jak meuranto, na nyan jak u timu, na nyan jak u barat, na nyan jak u tunong, na nyan jak u laot. Bak jameun dilee sigohlom na moto, indatu geutanyo geujak ngon tapak. Dari Seulimeum geuteungoh u Lamno, na rot lam uteun. Meunan cit dari Meulaboh u Blangkeujeuren geujak rot lam gle. Na rot uh lam uteun Potallah nyan. Teuma jino, rame awak geutanyo ka lu bak jak meuranto.

 Lheueh buleun Sapha, geutanyo ta tamong bak buleun Moklod. Lam buleun moklod nyo adat geutanyo peuget khanduri. Na nyan peuget khanduri tawok jame u rumoh, na nyan khanduri gampong. Bak khanduri gampong nyo, mandum ureung saboh gampong meuripee bacut sapo jeut geupeuna leumo ngon kameng. Tagun kuah bak meunasah, mandum ureung agam gampong jak meubuet. Teuma bak tagun kuah nyo ta kalon kiban urusan manajerial ureung geutanyo lam adat Aceh. Komando ka na nyan mat, hana jak meudawa-dawa. Nyan komando meuphom cara komando ureung, nyan jak bantu meuphom cit peu nyan jeut gobnyan peuget.

 Watee kuah ka masak, trok ureung nyan mat aweuk keu bagi kuah keu ureung gampong. Ureung mat aweuk nyo pih ka meuteuntee, kon meuranggari ureung. Meunyo pah ureung nyan mat aweuk, pah cit bagi kuah ngon aso jih. Teuma ladom ureung nyan mat aweuk meulaen peukateun. Sigohlom geubagi keu ureung gampong, ka geupeumeungkleh dua boh tima si keudro. Ino keuh ta kalon kiban peunteng ureung mat aweuk nyo beu ureung nyan teupat ngon meuakhlaq, ureung na agama ngon na eleumee. Carong mata bak geukalon keudro peu ka rata geubagi aso, kon asai geuleungo gob peugah: “beuleudi nyo hana aso lom, kuah khong.”

 Geutanyo ban lheueh pemilihan. Na gubernur, bupati, nyan mudah-mudahan i galak le masyarakat. Ureung-ureung nyo teuma nyan mat aweuk lam limong thon ukeu. Teuma lage khanduri moklod cit, ureung mat aweuk han jeut geupeuget sapeu miseu hana ureung gampong nyan jak peureuyoh, “beuleudi nyo hana aso lom, kuah khong!” Meunan cit ureung mat aweuk han jeut geujak tagun kuah keudro, peureulee ureung nyan cang boh panah ngon si, nyan peh alat, nyan sunyung kayee sampe bilik sabab i tamong asap lam mata, peureulee ureung cawo beulangong, nml (ngon mandum nyan laen). Bek na ureung nyan duk keudro publo sangak preh ureung mat aweuk meubut sidro.

 Billahit taufiq wal hidayah.

Ka trok sithon dame August 15, 2006

Posted by suhraaceh in Uncategorized.
add a comment

Assalamu alaikum,

Meunan keuh ta kalon bak beurita, ka trok sithon dame i Aceh. Ureung wateuh ka lheuh geutron geujak jok beude, beude pih ka jikoh. Teuma Undang-Undang Pemerintahan Aceh, menan jiboh nan, pih ka lheuh i suson le Indonesia, ka jijok u Aceh. Mandum polem nyan mat kuasa pih langsong geupeuo bagah-bagah, hana tingat keu rakyat nyan hana tem le keunong taki. Ka lheuh uro jeh keunong taki bak Jakarta, jino rakyat han tem le. Tapi masalah jih, so nyan mat aweuk nyan keuh nyan teumok kuwah. Rakyat preh mantong. Mudah-mudahan rakyat jeut konsisten geupeuraya su, lam geutulak UUPA nyan sigohlom sempurna peu-peu nyan ta lakee le rakyat Aceh jijok le Indonesia.